Reer Aw Xasan

November 12, 2021

Reer Aw Xasan waa: Xasan Ugaadh Aadan Maxamed Abokor (Aadan-madoobe).

Reer Aw Xasan waa: Aadan-madoobe, oo waa Habar Jecle, oo waa Isaaq, oo waa Dir.

Reer Aw Xasan iyo Surre, waa isku Kheyre Xasan Ugaadh Aadan-madoobe.

Surre waa naaneys, oo magaciisu waa Kheyre. Sidaas darteed, Beesha Surre iyo Beesha Reer Aw Xasan labadooduba waa Kheyre Xasan Ugaadh Aadan-madoobe – bi idni Allaah.

Xasan Ugaadh Aadan-madoobe, waxa uu dhaley:

1- Kheyre Xasan Ugaadh Aadan-madoobe
2- Faahiye Xasan Ugaadh Aadan-madoobe
3- Axmed Xasan Ugaadh Aadan-madoobe
4- Beyle Xasan Ugaadh Aadan-madoobe

Reer Aw Xasan waa qeybihii Aadan-madoobe, ee dagaalkii sokeeye, ee qarnigii 19aad dhinacaas Koonfureed u kala qaxey, ee gobolladaas Koonfureed ku kala baahey, ee ku tarmey, ee ku tafiirmey; ee duruufihii colaadeed daraadood u kala qolo-qoloobey.

Reer Aw Xasan gaar ahaan sida Surraha kale ama guud ahaan sida Aadan-madoobe oo idil, ayay iyaguna u baadiyoobeen, oo iyaguna u dibboodeen, oo iyaguna u go’doomeen, oo iyaguna ay tolkood uga go’een.

Waa nasiib darro’e, iyaguna xataa intii Koonfur ay iskula qaxeen, ee isku dhiigga ay ahaayeen, ee isku isirka ay ahaayeen, ee isku abtirsiinta ay ahaaayeen, ee isku Xasan Ugaadh Aadan-madoobe ay ahaayeen, ee isku Surre ay ahaayeen, ayaanay xataa is aqoonin, oo aanay xataa is haybsanin, oo aanay xataa is toleysanin, oo nasiib darro aanay ilaa haddeertan wada mideysneyn.

Reer Aw Xasan waa Surre, oo waa Kheyre Xasan Ugaadh Aadan-madoobe, oo waa saldanaddii Habar Jecle u talin jirtey, ee xadaaradda lahaan jirtey, ee ilbaxnimada lahaan jirtey, ee dekadaha iyo maraakiibta lahaan jirtey, ee Carabaha ilaa Hindiya ka baayac-mushtareyn jirtey, ee xidhiidhka ganacsi la lahaan jirtey – bi idni Allaah.

Haddeer iyo haatan, inkasta oo Aadan-madoobe uu muddo dheer sii kala maqan yahay, oo dagaalkii sokeeye, ee qarnigii 19aad kala qaxiyey ka dib, aanu dib isku soo wada haybsanin, oo sidii uu wali u kala tafaraaruqsan yahay, oo sidii uu wali u kala qolo-qoleysan yahay, haddana goor ay ahaataba, goor uun buu wada midoobi doonaa – bi idni Allaah.

Alla ha u naxariista'e, Salaan Carabey ayaa yidhi:
¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯¯
Duunyadatan kama liidataan, daaqi geedaha'e
Iyaba waa isdoontaan hadday, kala dibboodaane
Kolay deeradiyo cawsha tahay, doqoni waa liide
Nimanyahow tolnimo waa dugsiye, dunida jeedaasha.

Maxamed Sheekh Daahir
sheekhdaahir@gmail.com